Save

Save

Save

Save

Save

Save

لقاء إذاعي ما بعد الحوار

وطن مكلوم

كفانا جراح كفانا أحزان كفاهو اتألم السودان

يفوت العام يجينا العام نقوم نلقاهو بالاحضان

نقول بخيروا يغمرنا وتملا زهور كل مكان

 

برد البسمة لثغراً كان ناسي البسمة زمان

يحي الفرحة في قلباً

صبح مكلوم حزين ولا هان

يفوت العام جاري الخيبة والخذلان

طال ما نحنا بنكابر وكل الهم منو الكسبان ومنو الخسران

طفلاً يبكي ويتنهد يناتل في صدر نشفان

سموما للوجيه يلفح وجيها يكفي بس عنوان

خد للتراب جاور عيون اتوسدة اجفان

ورجولا حفيو من السير ترقي جبال تشق وديان

ناس مملموما تشتت بعد العز تعيش في هوان

همنا مسخ العيشة ورعبا شيب الولدان

وكم أطفال بتتيتم وكم اترملن نسوان

نفوساً تبكي ماضيها حليل بالسرور مزدان

حليلو بقرنا ومرحنا وحليل المنقة في الأغصان

حليل النقارة لم ترن وتعزف أجمل الألحان

وحليل الدنا بطولا كانت زاهية زي بستان

اتبدل صوت عصافيرا بصوت الرصاص والدان

وغزالها الكان بيتقدل فارق لربوعا وبان

مآسي تحير الألباب كيف يوصف مداها لسان

ليد بايدنا ننسف خيرنا ونهدم روعه البنيان

وليه بايدينا نقتل روحنا نزيدا جروحنا ونفتح لفتن بيبان

وليه نطرق طبول الحرب وفي الإمكان نعيش أخوان

ليه الشمطه في الدفة وقت الموج يصير طوفان

وقت كل زول بقد قدا أكيد مركبنا بس غرقان

وقت كل زول بقول بجاي يبقى مصيرنا لتوهان

وفي منو البحكم وكيف بحكم

كم بددنا نحن جهود كم ضيعنا نحن زمان

وفود تمشي وفود ترجع وداك راضي وداك حردان

نشرنا غسيلنا في الدنيا بعد غبرنا للحيشان

والجايينا للفتنة ما نرخيلو نحن اضان

دا بالبدمنا بتاجر يبيعنا بأبخس الاتمان

يحرش فينا ويتلبد ويبكي علينا بالهتان

يزرع في بذور الشر ونحصد نحن للاكفان

عشان ناس لا ايدا لا كراعا تموت يا أهلنا موت الضان

تموت لا عارفه ليها ذنب تموت لا عارفه ايه الكان

دي اللا شالت هموم ثروة ولا عارفة درب سلطان

كل مناها تعيش لا ليها لا بيها تعيش في أمان

ايه تهميش وقت الزول يعيش في بلدوا وين ما كان

زولا من اقصى الاقاصي يقوم يفتش رزقو في امدرمان

يصبح فيها سيد البيت سيد الحافلة والدكان

ايه تهميش وفينا طبيب وفينا القاضي والفنان

وفينا البنهي والبأمر وفينا الشيخ مع الحيران

كلام اسفاف ما بورثنا الا شقاق وما يزيدنا الا هوان

مافي سياسة غير سلام يحفظ عزة الأوطان

إرادة قوية متحدة ضد الفرقة والكيمان

لا جهوية لا عصبية لا قبلية لا الوان

كل الناس ولاد آدم وكل الناس عباد رحمان

أخير في الأرض نقعد نديرو حوارنا بتحنان

وننسى مرارة الماضي ننسى جراحنا ننسى الكان

نصفي النية لي الله نشيلوا وطنا في الوجدان

نفتش للبجمعنا نعضي عليه بالاسنان

وتبقى الكلمة بينا عهود حتى السكتة تكفي ضمان

وقالوا الصلح دايماً خير والمابيهو هو الندمان

والفاكر سلاحو الحل واهم في السراب عشمان

صحيح درب الخراب ساهل ودرب العمار صعبان

قدر ما نحنا نتناحر تفوت فرصة تضيع فرحة ويموت انسان

ويبقى بلدنا هو الخسران... هو الخسران

 

سالم عوض محمد